دوه ورځنی ورکشاپ د امارتي ارزاق شرکت د ولایتي کارمندانو لپاره

دوه ورځنی ورکشاپ د ارزاقو امارتي شرکت د ولایتي کارمندانو لپاره د سوداګریز مرستیال له خوا د تدارکاتو، مالي، اداري، املاکي چارو او بشري سرچینو د قوانینو او طرزالعملونو د پوهاوي په موخه ترسره شو.

په دې ورکشاپ کې د ارزاقو امارتي شرکت  د ولایتي نمایندګیو عمومي مدیران او د مرکزي څانګو مسؤلین هم ګډون درلود. دغه غونډه د ارزاقو امارتي شرکت  د اجرائیوي رئیس محترم مولوي عبدالرازق رفیع، د مالي او اداري مرستیال محترم مولوي مطیع الله مجروح او د سوداګریز مرستیال محترم محمد امین صاحب زاده په شتون کې د شرکت په کنفرانس تالار کې پیل شوه.

په دې ورکشاپ کې د بشري سرچینو آمر محترم رفیع الله نوري د مالي، اداري، تدارکاتي او املاکي چارو د مراحل طی کولو په اړه یوه پریزنټیشن وړاندې کړه او ګډونوالو ته یې د شرکت د امکاناتو او اړتیاوو په اړه معلومات ورکړل. نوموړي له ګډونوالو وغوښتل چې دغه مهم ټکي په کنفرانسونو، سیمینارونو او ورکشاپونو کې په پام کې ونیسي.

د غونډې ګډونوالو هم خپلې پوښتنې او نظریات له اړوندو مسؤلینو سره شریک کړل چې ځوابونه ورته وړاندې شول. باید وویل شي چې د داسې ورکشاپونو ترسره کول د کارمندانو د ظرفیت لوړولو، د قوانینو او طرزالعملونو د پوهاوي د کچې لوړولو او د شرکت له مهمو چارو سره د هغوی د لا ښه بلدتیا لپاره ګټور تمامېږي.