ارزاقو امارتي شرکت د کونړ سیدجمال الدین افغاني لیلیې او د بادغیس ولایت خالد بن ولید عالي دارالعلوم ته خوراکي توکي ولېږدول
د امارتي شرکتونو لوی ریاست اړوند ارزاقو امارتي شرکت د خپلو بنسټیزو فعالیتونو، خدمتونو او سوداګریز پلان له مخې؛ تېره ورځ د بادغیس ولایت خالد بن ولید عالي دارالعلوم او د کونړ سیدجمالالدین افغاني پوهنتون لیلیې او دیني جامعې ته د اړتیا وړ خوراکي توکي ولېږدول.
د یادو ولایتونو د ارزاقو مسوولینو د معلوماتو له مخې؛ دغه خوراکي توکي د اړوندو ادارو د اړتیا او غوښتنې پر بنسټ برابر او یادو ادارو ته د کتني پلاوي په شتون کې سپارل شوي دي. په دغو لېږدول شویو توکو کې وریجې، لوبیا، غوړي، بوره او یو شمېر نور اړین خوراکي مواد شامل دي.
د کونړ ولایت د ارزاقو مدیر کریم خان کلیوال ویلي دي، چې یاد خوراکي توکي د تلې، لړم او لیندۍ میاشتو د محصلینو د اړتیاوو د پوره کېدو په موخه د سیدجمالالدین افغاني پوهنتون د مسوولینو د غوښتنې پر بنسټ لېږدول شوي دي.
بلخوا، د بادغیس ولایت د ارزاقو مدیر محمدجان یوسفي ویلي، چې د دې ولایت د خالد بن ولید عالي دارالعلوم ته د وچو خوراکي توکو ترڅنګ یو شمېر تازه مېوې او سبزیجات هم لېږدول شوي دي.
د ارزاقو امارتي شرکت مسوولین وايي، چې د امارتي ادارو د اړتیاوو د پوره کولو په موخه د خوراکي توکو برابرول او لېږدول د دغه شرکت له مهمو خدمتونو او فعالیتونو څخه دي، چې په مناسب وخت او لوړ کیفت ورته خوراکي توکي برابر و لېږدول کېږي.
