ارزاقو امارتي شرکت د خپلو جایدادونو له لارې عواید ترلاسه کوي او سوداګریزې چوپړتیاوې وړاندې کوي
د ارزاقو امارتي شرکت د خپلو ملکیتونو او جایدادونو له عوایدو د هېواد اقتصادي وده پیاوړې کوي او ولس ته سوداګریزې اسانتیاوې برابروي.
په دې لړ کې، یاد شرکت د ننګرهار ولایت په څلورمه ناحیه کې یو څلور پوړیز سوداګریز مارکیټ د عامه او خصوصي مشارکت قانون له مخې یوه خصوصي شرکت ته سپارلی، چې د ۵۷۷ متره مربع ځمکې پر سر جوړ شوی او پکې د بیلابیلو توکو هټۍ شتون لري. د دې مارکیټ ساتنه او مدیریت د ارزاقو امارتي شرکت پر غاړه دی، او عواید یې هره میاشت د شرکت حساب ته لوېږي.
همداراز، د ارزاقو امارتي شرکت د یوه بل پنځه پوړیزه سوداګریز مارکیټ د جوړېدو چارې هم پیل کړې، چې د ۱۴۰۲ لمریز کال د قرارداد له مخې، د شهزاده ساپي خصوصي شرکت سره په مشارکتي ډول جوړیږي. د دې مارکیټ مساحت ۱۶۵۰ متره مربع دی، او ۲۵ کلن قرارداد لري، چې له مخې به د کال ۳۰ سلنه عواید د ارزاقو امارتي شرکت ته ورکول کېږي.
د ارزاقو امارتي شرکت د اسلامي امارت له بیا واکمنېدو راهیسې خپلې سوداګریزې چارې چټکې کړې، چې د پخواني نظام په پرتله ۸۰ سلنه پرمختګ موندل شوی. په تېرو دریو کلونو کې، یاد شرکت د سوداګرۍ او اقتصاد په برخه کې د پام وړ لاسته راوړنې لرلي او خلکو ته بېسارې خدمات وړاندې کړي دي.
یاد شرکت د هېواد په بېلابېلو ولایتونو کې سوداګریز مارکیټونه، سمینټي او اوسپنیز ګودامونه، او کرنیزې ځمکې لري، چې د هر ولایت د ملکیتونو او جایدادونو په اړه به نور معلومات هم له ولس سره شریک شي.
– د ارزاقو امارتي شرکت د نشراتو مدیریت
