د ارزاقو امارتي شرکت اړوند د ۷ بستونو تقریري آزموینه واخیستل شوه
د ارزاقو امارتي شرکت د ۷ خالي بستونو د ډکولو په موخه څه موده وړاندې تحریري آزموینه اخیستل شوې وه، چې د تحریري آزموینې د پایلو پر بنسټ؛ هغه نوماندان چې لوړې نمرې یې ترلاسه کړې وې، د مرکه یي (تقريري) آزموینې لپاره راغوښتل شوي وو.
یاده مرکه یي آزموینه د ارزاقو امارتي شرکت د مالي او اداري چارو رییس مولوي مطیعالله مجروح، د آزموینې د کمېټې غړو او د امارتي شرکتونو د لوی ریاست د استازي په شتون کې د څلورو ورځو په لړ کې واخیستل شوه.
د کارکوونکو چارو آمریت مسوول وویل، چې د شرکت پنځه مرکزي پنځم بستونو کې؛ د مغازو، د مالي خطرونو د څېړنې، د ګدامونو د تنظیم او وېش، د سوداګریو د تفاهم لیکونو او د تحویلخانې مدیریتونه شامل و. هغه زیاته کړه، چې دوه نور پنځم بستونه د خوست او پکتیکا د ارزاقو لوی مدیریتونو اړوند؛ د مالي، اداري او املاکو مدیریتونو پورې اړه درلودل.
د یاد آمریت مسوول همداراز وویل، چې د مرکه یي آزموینې له ارزونې وروسته د هر بست لوړه نومره ګټونکی نوماند به په رسمي توګه په دنده وګمارل شي.
