د ارزاقو امارتي شرکت له لوري اته قلمه خوراکي توکي د بلخ ولایت عامې روغتیا ته ولېږدول شول
د بلخ ولایت د ارزاقو لوی مدیر محمدکاظم مهدي یار وایي، چې تېره ورځ یې اته قلمه خوراکي توکي د دې ولایت عامې روغتیا ریاست ته لېږدولي دي.
نوموړی زیاتوي چې، په دې خوراکي توکو کې ۹۹۰۰ کیلوګرامه وریجې، ۲۱۸۰ کیلوګرامه غوړي، ۲۴۰۰ کیلوګرامه لوبیا، ۲۵۰ کیلوګرامه رُب، ۶۸۰ کیلوګرامه ممیز(کشمش)، ۳۸۰ کیلوګرامه میده بوره، ۱۵ کیلوګرامه د دیګ مصاله او ۸۶۸ کیلوګرامه اعلی درجه بسکویت شامل دي، چې د کتنې پلاوي په شتون او د ټاکل شویو معیارونو سره سم د اړوندې برخې مسوول ته تسلیم شول.
مهدي یار ډاډ څرګند کړ، چې د بلخ ولایت د عامې روغتیا مسوولین د خوراکي توکو د لېږد له پروسې خوښي څرګندوي او د ارزاقو امارتي شرکت له خدمتونو تود هرکلی کوي.
د یادونې وړ ده، چې د خوراکي توکو د لېږد، وېش او څارنې بهیر د ارزاقو امارتي شرکت د ولایتي مدیریتونو له خوا په ټولو ولایتونو کې په دوامداره توګه ارزول کیږي.
