ارزاقو امارتي شرکت د آسیا څلور پوړیز سوداګریز مارکیټ له قراردادي شخص څخه ترلاسه کړ
ارزاقو امارتي شرکت، د نشراتو مدیریت،
ارزاقو امارتي شرکت د خپلو شته جایدادونو او سوداګریزو مارکیټونو د سم مدیریت له لارې توانېدلی، چې د عوایدو د کچې په لوړولو او هېوادوالو ته د کاري زمینو په برابرولو کې مهم او اغېزناک ګامونه پورته کړي.
د ارزاقو امارتي شرکت د سوداګریزو چارو رییس مولوي سیدنیک محمد معتصم وویل، چې د شرکت له جایدادونو او شته امکاناتو څخه اغېزمنه ګټه اخیستنه نه یوازې د شرکت په عوایدو کې زیاتوالی راولي؛ بلکې خلکو ته د کار، سوداګرۍ او هوساینې مناسب فرصتونه هم برابروي.
نوموړي زیاته کړه، چې د تېر نظام په لومړنیو کلونو کې د ارزاقو شرکت د کارکوونکو د هڅو په پایله کې د دغه شرکت سوداګریز مارکیټ د مشارکتي تړون په ډول جوړ او قراردادی شخص ته ورکړل شوی ؤ.
مولوي معتصم وویل، چې د آسیا سوداګریز مارکیټ وړمه ورځ د قراردادي شخص څخه د ګډو ادارو د پلاوو تر څار لاندې په رسمي ډول د شرکت د املاکو آمریت ته وسپارل شو.
مولوي معتصم څرګنده کړه، چې له دې وروسته به د یاد مارکیټ د هټیوالو څخه د عوایدو راټولولو بشپړ مسوولیت د ارزاقو امارتي شرکت د املاکو او مالي آمریتونو پر غاړه وي، چې دا چاره به د شرکت د عوایدو په لوړولو او د مالي چارو په لا منظمېدو کې مهم رول ولوبوي.
د املاکو آمریت د معلوماتو له مخې؛ دغه څلور پوړیز سوداګریز مارکیټ چې د ۹۶۰ متره مربع ځمکې پر سر جوړ شوی، په لومړي پوړ کې د الکترونیکي وسایلو پلورنځي، په دویم او درېیم پوړونو کې د الکترونیکي وسایلو د ترمیم مرکزونه او په څلورم پوړ کې یو باب هوټل شتون لري.
د یادونې وړ ده، چې په آسیا سوداګریز مارکیټ کې کابو ۱۸۰ بابه هټۍ او غرفې شته دي، چې دا مهال د سوداګرۍ او کاروبار په موخه ترې ګټه اخیستل کېږي او لسګونو هېوادوالو ته یې د کار زمینه برابره کړې ده.
