د زابل ولایت د ارزاقو لوی مدیر د کار او ټولنیزو چارو اړوند روزنتون څخه څارنه وکړه
د زابل ولایت د ارزاقو مالي او اداري مدیر ښاغلي عبدالمالک مصلح، وايي چې نن ورځ د ارزاقو لوی مدیر مولوي نعمت الله مبرور د کار او ټولنیزو چارو اړوند روزنتون څخه څارنه وکړه. نوموړي وویل، چې دا څارنه په داسې حال کې ترسره شوه، چې د یاد روزنتون زده کوونکو لپاره پخلی او د خوړو د وېش لړۍ روانه وه.
ښاغلي مصلح زیاته کړه، د زابل ولایت د ارزاقو مدیریت په دوامداره توګه د شرکت له پروژو څارنه او ارزونه کوي، ترڅو د پروژو تطبیق په سمه توګه عملي شي او کومه ستونزه رامنځته نه شي.
همدارنګه ښاغلي مصلح وویل، چې د زابل ولایت د کار او ټولنیزو چارو اړوند روزنتون آمر ملا شفيع الله اخند سره د قرارداد په ځانګړتیاوو او نورو مسایلو هم خبرې وشوې.
نوموړي ډاډ څرګند کړ، چې د زابل ولایت د کار او ټولنیزو چارو ریاست اړوند روزنتون آمر د ارزاقو امارتي شرکت د خوراکي توکو د لېږد پروسې څخه خوښ او رضایت لري.
د یادونې وړ ده، چې د ارزاقو امارتي شرکت د خپلو بنسټیزو فعالیتونو له مخې؛ امارتي او خصوصي ادارو ته د اړتیا وړ خوراکي توکي برابرولو او لیږدونې پروژه پر مخ وړي، چې په دې پروژه کې د زابل ولایت روزنتون هم شامل دی.
