د کونړ ولایت د ارزاقو لوی مدیر د کار او ټولنیزو چارو ریاست اړوند روزنتون له لیلې څارنه ترسره کړه
د کونړ ولایت د ارزاقو لوی مدیر کریم خان کلیوال وایي، چې وړمه ورځ یې د کار او ټولنیزو چارو وزارت اړوند روزنتون د لیلې له پخلنځي څخه څارنه وکړه.
هغه څرګنده کړه، چې یاده څارنه د خدمتونو د کیفیت د لوړوالي، د چارو د سمبالښت او د خنډ او ځنډ د مخنیوي په موخه ترسره شوې ده.
کلیوال زیاته کړه، چې د څارنې پر مهال یې د روزنتون او د لیلې له مسوولینو سره خبرې وکړې، د هغوی نظرونه او غوښتنې یې واورېدې او د پخلي چارو د لا ښه والي لپاره یې آشپزانو ته لازمې سپارښتنې او لارښوونې وکړې.
د ارزاقو مدیر وویل، چې د څارنې په پای کې د روزنتون او د لیلې مسوولینو د ارزاقو امارتي شرکت له لوري د وړاندې شویو خدمتونو ستاینه وکړه او ډاډ یې ورکړ، چې دوی به هم د خپلو همکاریو بهیر ته دوام ورکړي.
هېره دې نه وي، چې په مرکز او ولایتونو کې د ارزاقو امارتي شرکت د پروژو له تطبیق څخه په دوامداره توګه څارنه او نظارت ترسره کیږي.
