د ارزاقو امارتي شرکت د مدیره پلاوي غونډه ترسره شوه
د ارزاقو امارتي شرکت د مدیره پلاوي غونډه د شرکت په ریاست کې د حمیدالله عبداللهي په مشرۍ ترسره شوه.
په دې غونډه کې د اقتصاد وزارت استازي عبداللطیف یوسفزي، د سوداګرۍ وزارت استازي یعقوبي، د مدیره پلاوي غړو، د شرکت اجرائیوي رییس مولوي عبدالرازق رفیع، د مالي او اداري چارو رییس مولوي مطیعالله مجروح، د سوداګریزو چارو د پراختیا رییس مولوي سیدنیک محمد معتصم او همداراز د مالی، تدارکاتو، خدماتو، کارکوونکو، سوداګریزو چارو د پراختیا او جایدادونو آمرینو، د اجرائې، کنټرول، پلټنې، پلان او پالیسۍ مدیرانو ګډون درلود.
غونډه د قرآن کریم د څو مبارکو آیتونو په تلاوت پیل شوه او ورپسې د شرکت اجرائیوي رییس مولوي عبدالرازق رفیع د غونډې ګډونوالو ته ښه راغلاست وویله.
د یادې غونډې په لړ کې د شرکت د بنسټیزو، سوداګریزو او خدماتي فعالیتونو، د مالیاتو د ورکړې او تصفیې او نورو اړوندو موضوعاتو په اړه معلومات وړاندې شول او پرې هر اړخیز بحثونه ترسره شول.
د مدیره پلاوي مشر د ارزاقو امارتي شرکت له لوري د مالیاتو د ورکړې او تصفیې فعالیت وستایه او دا یې د ملي بودیجې د پیاوړتیا په برخه کې اغېزمن پرمختګ وباله.
د غونډې په اجنډا کې د شرکت د 1405 مالي کال د مالي، سوداګریز او تدارکاتي پلانونه او نور اړوند موضوعات هم شامل وو، چې د مدیره پلاوي له لوري د هر اړخیز بحث وروسته د تائید وړ وګرځیدل.
یاده غونډه د شرکت د لا پرمختګ او د هېواد د ښېرازۍ او ودې لپاره د دعا په لوستلو سره پای ته ورسېده.
