د ارزاقو امارتي شرکت د ولایتي مدیریتونو اړوند خالي بستونو لپاره آزموینه واخیستل شوه؛
د ارزاقو امارتي شرکت د ۷ ولایتونو د ارزاقو لوی مدیریتونو پورې اړوند د خالي بستونو د ډکولو او کار اهل کسانو ته د سپارلو په موخه آزموینه واخیستل شوه.
یاده آزموینه، چې په شفاف ډول د ټاکلي پلاوي او د امارتي شرکتونو لوی ریاست د استازي په شتون کې ترسره شوه، په کې ۶۲ تنه برخه اخیستې وه.
له آزموینې وړاندې د ارزاقو امارتي شرکت د مالي او اداري چارو رییس مولوي مطیعالله مجروح د آزموینې د ارزښت، شفافیت او د ورسپارل شوو دندو د مسوولانه ترسره کولو په اړه لنډې او مفصلې خبرې وکړې.
نوموړي ټینګار وکړ، چې یاده آزموینه به په بشپړ شفافیت سره واخیستل شي، څو د وړتیا لرونکو کسانو لپاره د دندو د ترلاسه کولو زمینه برابره شي.
مجروح وویل، هر څوک باید خپلو دندو ته جدي پاملرنه وکړي او خپلې ورسپارل شوې دندې په اخلاص، صداقت او مسوولیت منوونکي ډول ترسره کړي.
د ارزاقو امارتي شرکت دکارکوونکو چارو سرپرست آمر ښادي ګل صاحبزاده وایي، چې یاده آزموینه د فراه،کندهار، بدخشان، بغلان، میدان وردګو، بلخ او غور ولایت د ارزاقو مدیریتونو اړوند خالي بستونو د ډکولو لپاره اعلان ته سپارلي و، چې کابو ۲۵۴ کسانو نوملیکنه کړي وه او له شارټ لیست وروسته په شرایطو برابر کسان آزموینې ته راوغوښتل شول.
د صاحبزاده په وینا، آزموینه د مالي، اداري، املاکو مدیریتونو او یو عمومي مدیریت د بست لپاره واخیستل شوه.
د نوموړي دمعلوماتو له مخې؛ آزموینه په لیکلي ډول ترسره او د ټاکل شوي پلاوي له خوا به د پارچو ارزونه په شفاف ډول وشي او د هر بست لپاره به غوره نومرې ترلاسه کوونکي کسان مرکې ته راوغوښتل شي.
د یادونې وړ ده، چې د ارزاقو امارتي شرکت هڅه کوي د شفافو او عادلانه آزموینو له لارې مسوولیتونه وړ او مسلکي کسانو ته وسپاري، څو د غوره خدمتونو وړاندې کولو بهیر چټک او غښتلی شي.
