د بادغیس ولایت د ارزاقو لوی مدیر د کار او ټولنیزو چارو ریاست اړوند روزنتون څخه څارنه او ارزونه وکړه
د بادغیس ولایت د ارزاقو لوی مدیر ښاغلی محمد یوسفي وايي، چې تېره اونۍ یې د دې ولایت د کار او ټولنیزو چارو ریاست اړوند روزنتون څخه څارنه او ارزونه وکړه، چې په دغه بهیر کې د یاد ریاست یو تن پلاوی هم له نوموړي سره ملتیا کوله.
یوسفي زیاته کړه، چې دا مهال په یاد روزنتون کې ۱۵۰ تنه یتیمان او بې سرپرسته ماشومان تر روزنې لاندې دي او اړین خوراکي توکي ورته د ارزاقو امارتي شرکت له خوا برابرېږي.
نوموړي ډاډ څرګند کړ، چې د روزنتون د لیلیې لپاره د خوراکي توکو برابرول او چمتو کول په ښه او منظم ډول ترسره کېږي. هغه دا هم وویل، چې د یاد روزنتون مسوولین د ارزاقو امارتي شرکت له پروژوي فعالیتونو خوښ دي او په دې برخه کې یې رضایت څرګند کړی دی.
باید وویل شي، چې دا ډول څارنه، ارزونه او د خوراکي توکو برابرول نه یوازې په مرکز کې؛ بلکې په ټولو ولایتونو کې د ارزاقو امارتي شرکت له خوا په دوامداره توګه تر سره کېږي.
