د ارزاقو امارتي شرکت فعالیتونه او خدمتونه
د ارزاقو امارتي شرکت د اساسي او غیر اساسي برخو له لارې ولس ته ارزښتناکه خدمتونه وړاندې کوي.
اساسي فعالیتونه او خدمات
د ارزاقو امارتي شرکت اساسي فعالیتونه د دولتي او غیر دولتي ادارو لپاره د خوراکي توکو برابرولو ته ځانګړي شوي دي، چې دا چاره د مختلفو قراردادونو له مخې ترسره کېږي.
غیر اساسي فعالیتونه
غیر اساسي فعالیتونه د شرکت جایدادونو ته ځانګړي شوي، چې پکې سوداګریز مارکیټونه، کرنیزې ځمکې، اوسپنیز، سمینټي او سرپوښ لرونکي ګودامونه شامل دي. دا جایدادونه د کرایې او قرارداد له لارې سوداګرو او عامو خلکو ته د کار او سوداګرۍ لپاره ورکول کېږي.
د ارزاقو امارتي شرکت پرمختګ
د افغانستان اسلامي امارت د بیا واکمنېدو راهیسې د ارزاقو امارتي شرکت فعالیتونه ۸۰ سلنه پرمختګ کړی او د شرکت کړنې لا ګړندۍ شوې دي. د شرکت مشرتابه هڅه کوي، چې دا بدلونونه نور هم مثبت لوري ته بوځي.
د شرکت جایدادونه او سوداګریز فعالیتونه
د شرکت د سوداګریزو فعالیتونو په لړ کې، د ننګرهار او لغمان ولایتونو سوداګریز مارکیټونه معرفي شوي، او نن د څرخي پل د سیمې تجارتي ګودامونو ته لنډه کتنه کوو.
د کابل پکتیاکوټ صنعتي پارک ګودامونه
په پلازمېنه کابل، د پکتیا کوټ صنعتي پارک کې، د ارزاقو امارتي شرکت اړوند ۶ لوی ګودامونه شتون لري، چې ۶۸۰۰۰ متر مربع ځمکه احتوا کوي او د سوداګریزو چارو لپاره مناسب ځای بلل کېږي.
دا ګودامونه د زرهاوو ټنو خوراکي توکو د ذخیره کولو ظرفیت لري، چې کولی شي د خوراکي توکو د ناورین په مخنیوي کې مهم رول ولوبوي.
د ارزاقو امارتي شرکت د جایدادونو مسؤلین وایي، چې له دغو ۶ ګودامونو څخه یو د شرکت اړینو خوراکي توکو لپاره ځانګړی شوی او پاتې پنځه نور د قرارداد له لارې دولتي ادارو او خصوصي شرکتونو ته سپارل شوي دي.
د کاري فرصتونو ایجاد
د ارزاقو امارتي شرکت د خپلو اساسي او غیر اساسي فعالیتونو له لارې، تر دې دمه 4000 تنو ته مستقیم او غیر مستقیم کاري فرصتونه برابر کړي دي. د شرکت مسؤلین هڅه کوي، چې دا شمېره نوره هم لوړه کړي.
ټیپیک مغازې
د ارزاقو امارتي شرکت په کابل ښار کې ۱۲ ټیپیک مغازې لري، چې ساتنه او مدیریت یې د شرکت لخوا کېږي. دا مغازې اوس مهال یادې مغازې د ساتنې او د شرکت عوایدو په موخه په کرایې ورکړل شوي دي.
د اقتصادي پراختیا لپاره هڅې
د ارزاقو امارتي شرکت د خپلو شته جایدادونو له لارې نه یوازې د شرکت عواید زیاتوي، بلکې ګڼو هېوادوالو ته کاري فرصتونه هم برابروي. دا پروسه د خلکو پر اقتصادي وضعیت مثبت اغېز لري او د هېواد د اقتصادي ودې لپاره ګټوره تمامېږي.
راتلونکی هدف
زموږ اساسي هدف دا دی، چې د ارزاقو امارتي شرکت د خوراکي توکو د برابرولو ترڅنګ، خپل ټول جایدادونه په تجارتي ګټو واړوو او خلکو ته د کار زمینې برابرې کړو، ترڅو د هېواد اقتصادي پرمختګ ته لا زیات وده ورکړو.
#نشراتوــمدیریت
