د کاپیسا ولایت د ارزاقو لوی مدیر د روزنتون له پروژې لیدنه وکړه؛
د کاپیسا ولایت د ارزاقو مدیر قاري فریدون مصلح د ارزاقو امارتي شرکت د پروژو دښه تطبیق او عملي کولو په موخه وړمه ورځ د کار او ټولنیزو چارو ریاست اړوند روزنتون ته ورغی او د پروژې څارنه یې وکړه.
قاري فریدون مصلح په داسې حال کې له یاد روزنتون څخه لیدنه وکړه چې په دې وخت کې د روزنتون زده کوونکو ته د غرمې پخلی او د ډوډۍ وېش لړۍ روانه وه.
په دې څارنه کې د روزنتون آمر هم شتون درلود او د ارزاقو امارتي شرکت د پروژو د ښه تطبیق په اړه یې ډاډ څرګند کړ.
هغه وویل، چې تر دې دمه د کاپیسا ولایت اړوند روزنتون د پروژې په پلي کولو کې کومه تشه نه ده لیدل شوې او د ارزاقو مدیریت کړنې یې د ستایلو وړ وبللې.
قاري فریدون مصلح همدارنګه زیاته کړه چې د ارزاقو امارتي شرکت د موجودو پروژو تطبیق او عملي کول په دې ولایت کې د مدیریت تر څارنې لاندې پر مخ ځي، چې پدې پروژو کې د خامو توکو اکمال او پخلی شامل دي.
