د بادغیس ولایت د ارزاقو لوی مدیر له روزنتون څخه څارنه وکړه؛
د بادغیس ولایت د ارزاقو لوی مدیر محمدجان یوسفي تېره ورځ د دې ولایت د کار او ټولنیزو چارو ریاست اړوند روزنتون زده کوونکو ته د پخلي او ډوډۍ د برابرولو او وېش پر مهال څارنه او ارزونه ترسره کړې ده. نوموړی وايي، چې دڅارنې او ارزونې له بهیره د کار او ټولنیزو چارو او عامې روغتیا ریاستونو استازو هم ملتیا کوله.
ښاغلي یوسفي وویل، چې دا مهال په یاد روزنتون کې ۱۶۰ تنه یتیمان او بې سرپرسته ماشومان تر روزنې لاندې دي او اړین خوراکي توکي د ارزاقو امارتي شرکت له خوا برابرېږي.
هغه ډاډ څرګند کړ، چې د روزنتون د لیلیې لپاره د خوراکي توکو برابرول او چمتو کول په ښه او منظم ډول روان دي او د روزنتون مسوولین د ارزاقو امارتي شرکت له چوپړتیاوو خوښ او په دې برخه کې رضایت یې څرګند کړی دی.
دا په داسې حال کې ده، چې په مرکز او ولایتونو کې د خوراکي توکو د برابرولو او څارنې بهیر د ارزاقو امارتي شرکت له خوا په دوامداره توګه ترسره کیږي.
