ارزاقو امارتي شرکت؛ د اقتصادي ودې پر لور
ارزاقو امارتي شرکت د اسلامي نظام له راتګ سره سم د هېواد په اقتصادي ډګر کې د پام وړ پرمختګ تجربه کړی دی. دغه شرکت نه یوازې د خدماتي چارو د پراختیا لپاره هڅې کوي؛ بلکې د ولسونو د هوساینې، د بېکارۍ د کچې د راټیټولو او د ملي اقتصاد د پیاوړتیا په برخه کې هم مهم رول لوبوي.
د شرکت د مسوولینو د معلوماتو له مخې، ارزاقو امارتي شرکت د خپلو فعالیتونو په پراختیا کې شاوخوا ۸۵ سلنه پرمختګ کړی دی. شرکت هڅه کوي، چې د خپلو خدماتو کیفیت لا ښه کړي او د فعالیتونو ساحه پراخه.
شرکت په پام کې لري، چې د بنسټیزو پروژو له لارې نه یوازې دولتي ادارو ته خدمتونه وړاندې کړي؛ بلکې په ښاري سیمو کې ځنځیري مغازې جوړې او د ځایي ولسونو اړتیاوې پوره کړي. ارزاقو امارتي شرکت د لا ډېرو اقتصادي پروژو د ترلاسه کولو هڅه کوي، څو د هېواد د اقتصادي ودې ترڅنګ د بېکارۍ کچه راټیټه کړي او د خلکو د ژوند چارې ښې کړي.
اقتصادي کارپوهان باور لري، که ارزاقو امارتي شرکت وکولای شي له ملي او سیمهییزو سوداګرو سره د خوراکي توکو د تولید، وارداتو، خوندیتوب او وېش په برخه کې ګډې طرحې جوړې کړي، نو دا به د شرکت د فعالیتونو کچه تر سل سلنې پورې لوړه کړي او د هېواد په اقتصادي او ټولنیز پرمختګ کې به ستر رول ولوبوي.
شرکت له ټولو ملي او سیمه ئیزو پانګوالو غوښتنه کوي، چې خپلې پانګې د دغه شرکت د پرمختګ او د ولسونو د هوساینې په لار کې ولګوي. دغه چاره به نه یوازې د هېواد اقتصاد ته وده ورکړي؛ بلکې د ټولنې لپاره به د دوامدارې هوساینې او ثبات زمینه هم برابره کړي.
