د ارزاقو امارتي شرکت د سوداګریزو چارو رییس د افغانستان او ازبکستان د سپکو صنایعو لومړني ګډ نندارتون کې ګډون وکړ
د افغانستان او ازبکستان د سپکو صنایعو لومړنی ګډ نندارتون د ازبکستان د ترمز ښار په نړیوال سوداګریز مرکز کې جوړ شوی و، چې د دواړو هېوادونو ګڼ شمېر صنعتي تولیدات، سوداګریز توکي او محصولات په کې نندارې ته وړاندې شول.
په دغه نندارتون کې د ارزاقو امارتي شرکت د سوداګریزو چارو رییس مولوي سید نیک محمد معتصم او د سوداګرۍ پراختیا او پانګونې د جلب آمر اسدالله ابراهیمي هم ګډون کړی و.
په یاد نندارتون کې د افغانستان او ازبکستان بېلابېل صنعتي تولیدات او سوداګریز محصولات نندارې ته وړاندې شول. د دغه نندارتون موخه د دواړو هېوادونو د تولیداتو، محصولاتو او صنعتي وړتیاوو معرفي کول او د سوداګریزو اړیکو د پراختیا لپاره د نویو فرصتونو رامنځته کول بلل شوي دي.
د ارزاقو امارتي شرکت د سوداګریزو چارو رییس مولوي سید نیک محمد معتصم وویل، په دغه نندارتون کې د ګډون موخه یې د ازبکستاني هېواد له سوداګرو او پانګوالو سره د اړیکو پراخول او د سوداګرۍ او اقتصادي همکاریو د لا پیاوړتیا لپاره د نویو فرصتونو موندل یاد کړل.
نوموړي زیاته کړه، چې د خوراکي توکو په برخه کې له ګڼ شمېر سوداګرو سره د وارداتو په اړه خبرې شوې دي. د نوموړي په وینا، یادو سوداګرو لېوالتیا ښودلې، چې په راتلونکي کې د شرکت د خدمتونو د پیاوړې کولو په موخه د اړوندې ادارې په همغږۍ او همکارۍ اوړه، غوړي، نخود، لوبیا، بوره، چای او د نورو اړینو خوراکي توکو د واردولو زمینه برابره کړي.
د یادونې وړ ده، چې ارزاقو امارتي شرکت هڅه کوي، د سوداګریزو پروګرامونو او نندارتونونو له لارې د سوداګرۍ د پراختیا او اقتصادي همکاریو د پیاوړتیا لپاره له شته فرصتونو څخه اغېزمنه ګټه پورته کړي.
