د ارزاقو امارتي شرکت د مدیره پلاوي غونډه ترسره شوه
د ارزاقو امارتي شرکت د مدیره پلاوي غونډه د دې شرکت په ریاست کې د حمیدالله عبداللهي پر مشرۍ ترسره شوه.
په غونډه کې د سوداګرۍ وزارت استازي مولوي محمداجمل ادریس، د اقتصاد وزارت استازي عبداللطیف یوسفزی، د مدیره پلاوي غړي، د شرکت اجرائیوي رییس مولوي عبدالرازق رفیع، د شرکت د مالي او اداري چارو رییس مولوي مطیعالله مجروح او د مالی، تدارکاتو، کارکوونکو، سوداګریزو چارو د پراختیا او جایدادونو آمرینو ګډون درلود.
د شرکت اجرائیوي رییس مولوي عبدالرازق رفیع د غونډې پر مهال د شرکت د چارو د اغېزمنتیا او لا پرمختګ په اړه خپلې څرګندونې او وړاندیزونه وړاندې کړل.
د مدیره پلاوي په غونډه کې د شرکت د پرمختګ او د خدماتو د لا ښه والي په تړاو څو مهم موضوعات وڅېړل شول. د دې غونډې په اجنډا کې د شرکت پر مالياتو بحث، د شرکت د ولایتي او مرکزي جایدادونو لپاره د قیمت اېښودنې پروسه، د ګدامونو لپاره د خوراکي توکو د خوندي ساتنې په موخه د برېښنايي سیستم رامنځته کول، د امنیتي کامرو لګول او د شرکت په انګړ کې د کونیکس کانټینرونو اېښودل شامل و، چې د مدیره پلاوي له لوري تائید او پرې لازمې پرېکړې وشوې.
په پای کې د مدیره پلاوي رییس حمیدالله عبداللهي د شرکت د چارو د ښه پرمختګ په اړه خبرې او تحلیلي څرګندونې وکړې او غونډه د دعا په لوستلو پای ته ورسېده.
