د ارزاقو امارتي شرکت په انګړ کې میوه لرونکي نیالګي، زینتي بوټي او ګلان کېنول شول؛
د ارزاقو امارتي شرکت له لوري د نیالګیو کېنولو پروګرام جوړ شوی و، چې په دې پروګرام کې د شرکت اجرائیوي رئیس مولوي عبدالرازق رفیع، د مالي او اداري چارو رئیس مولوي مطیع الله مجروح، د سوداګریزو چارو رئیس محمدامین صاحبزاده، د شرکت ځیني آمرینو، مدیرانو او خدماتي کارکوونکو برخه اخیستې وه.
د نیالګیو کېنولو پروګرام د شرکت د مالي او اداري چارو په دعایي او د شرکت د اجرائیوي رئیس او دواړه رئیسانو لخوا د یوـ یو نیالګی په کېنولو سره پیل شو.
د نیالګیو کېنولو په پروګرام کې د ارزاقو امارتي شرکت اجرائبوي رئیس مولوي عبدالرازق رفیع د نیالګیو کېنولو ګټې کارکونکو ته بیان کړې او له ټولو کارکوونکو یې غوښتنه وکړه، چې د یوه پاک او زرغون چاپیریال او د ښې روغتیا د تضمین په پاره خپل چاپیریال کې نیالګی کېنوي.
ښاغلي مولوي عبدالرازق رفیع وویل، نیالګي کېنول او په ثمر رسېدل نه یوازې په هېواد کې سمسورتیا او زرغونتیا رامنځته کوي؛ بلکې راتلونکي نسل ته د لاس نښه او د نیالګیو کېنولو فرهنګ ژوندی پاتې کیږي.
د ارزاقو امارتي شرکت د خدماتو مسوولین وايي، چې د یاد شرکت انګړ او بڼ کې به څه باندې ۵۰۰ میوه لرونکي او غیر میوه لرونکي نیالګي، زینتي بوټي او ګلان کېنول شي، چې د شرکت د خدماتو مدیریت لخوا به په دوامداره توګه ساتنه او مراقبت وشي.
د یادونې وړ ده، چې د ارزاقو امارتي شرکت انګړ کابو (۳۰۰۰۰) مترمربع مساحت لري، چې د یوې زینتي او میوه لرونکي بڼ په توګه هم یادېدلی شي.
