د هلمند ولایت د ارزاقو لوی مدیر د کار او ټولنیزو چارو ریاست له روزنتون څخه څارنه وکړه؛
د هلمند ولایت د ارزاقو لوی مدیر مولوي قدرت الله معصوم د کار او ټولنیزو چارو اړوند د امام احمد ابن حبان بستي روزنتون زده کوونکو ته د پخلي او ډوډۍ د برابرولو او وېش پر مهال څارنه وکړه.
مولوي قدرت الله معصوم وویل، چې د ارزاقو مدیریت له مسوولیتونو څخه یو هم د پروژو د ښه تطبیق او په کاري برخو کې د خلاوو ډکول دی، چې له بریالیو کړنو او د ادارو د رضایت سبب ګرځي. نو په همدې اساس، زموږ څارنه او نظارت د ارزاقو له پروژو په مداوم ډول ترسره کېږي.
ښاغلي معصوم ډاډ څرګند کړ، چې د دې ولایت د کار او ټولنیزو چارو اړوند روزنتون ۲۰۰ تنو زده کوونکو ته په وخت او ښه کیفیت د خوړو برابرول، د مسوولینو او زده کوونکو د رضایت او تایید وړ ګرځېدلي دي.
د یادونې وړ ده، چې د ارزاقو امارتي شرکت د خپلو بنسټیزو فعالیتونو له مخې دولتي او نادولتي ادارو ته د اړتیا وړ خوراکي توکو د برابرولو او لیږد پروژه پر مخ وړي، چې د هېواد د ټولو ولایتونو روزنتونونه هم په دې پروژه کې شامل دي.
#د نشراتو مدیریت
