د ارزاقو امارتي شرکت له لوري د هرات پوهنتون او د ملا علي القاري الهروي جامعې ته خوراکي توکي ولېږدول شول
د هرات ولایت د ارزاقو لوی مدیر وایي، چې د تېرې اوونۍ په ورستیو کې د ارزاقو امارتي شرکت له خوا د دې ولایت پوهنتون او د ملا علي القاري الهروي جامعې لیلییو ته یو اندازه خوراکي توکي لېږدول شوي دي.
نوموړي زیاته کړه، چې په یادو خوراکي توکو کې وریجې، غوړي، لوبیا، نخود، چای او نور خوراکي توکي شامل وو، چې د ارزاقو ولایتي مدیریت له خوا د کتنې پلاوي په شتون کې د پوهنتون او یادې جامعې اړوندو مسوولینو ته وسپارل شول.
د یادونې وړ ده، چې د ارزاقو امارتي شرکت له خوا د خوراکي توکو د لېږد بهیر په ټول هېواد کې په چټکۍ سره روان دی او هغه ادارې، چې له یاد شرکت سره تړون لري او خوراکي توکي تر لاسه کوي، له کیفیت او کمیت یې خوښي څرګندوي.
