د ارزاقو امارتي شرکت اړوند د آسیا مارکېټ د بیارغونې چارې په چټکۍ روانې دي
د امارتي شرکتونو لوی ریاست اړوند د ارزاقو امارتي شرکت په ملکیت کې د آسیا سوداګریز مارکېټ د بیارغونې او ترمیم چارې په چټکۍ او منظم ډول روانې دي.
د ارزاقو امارتي شرکت د املاکو آمریت د معلوماتو له مخې؛ آسیا سوداګریز مارکېټ د کابل ښار د درېیمې ناحیې د میرویس میدان (کوټې سنګي) په سیمه کې موقعیت لري. دغه څلور پوړیز مارکېټ د ۹۶۰ متره مربع ځمکې پر سر جوړ شوی، چې په لومړي پوړ کې یې د برېښنایي وسایلو پلورنځي، په دویم او درېیم پوړونو کې د دغو وسایلو د ترمیم مرکزونه او په څلورم پوړ کې هوټل فعالیت کوي.
د املاکو آمریت انجنیر عبیدالله کریمي وویل، د شرکت له لوري د یاد مارکېټ د بیارغونې چارې د تخنیکي معیارونو له مخې په منظم ډول روانې دي. د نوموړي په وینا، غیرمعیاري غرفې لرې شوې او د مارکېټ د داخلي جوړښت له مخې په معیاري ډول بیا تنظیم شوې دي.
هغه زیاته کړه، چې د مارکېټ د بام د اوبو ایستلو سیستم ترمیم، د روشندانونو، کټارو، پیزارو، سرامیککارۍ، د زینو د ډبرو نصب او د اوبو رسولو سیستم د بیارغونې چارې هم پر مخ روانې دي.
د ده د معلوماتو له مخې؛ تر اوسه د دویم او درېیم پوړ د سرامیککارۍ، کټارو نصب، پیزارو او پلاسترکارۍ چارې بشپړې شوې دي او پاتې رغنیزې چارې به هم په نږدې راتلونکي کې بشپړې شي.
د هغه په خبره، د دغو رغنیزو چارو له بشپړېدو وروسته به د مارکېټ ظاهري بڼه لا معیاري شي، هټیوالو ته به غوره اسانتیاوې برابرې شي او د اقتصادي فعالیتونو د پراختیا او د عوایدو د زیاتوالي زمینه هم برابره شي.
د شرکت د املاکو مسوولین وایي، آسیا سوداګریز مارکېټ د تېر کال په وروستیو کې د قراردادي شخص څخه بېرته د ارزاقو امارتي شرکت واک ته وسپارل شو. د دوی په وینا، اوس مهال د مارکېټ ټولې سوداګریزې چارې د شرکت تر مستقیم مدیریت لاندې پر مخ روانې دي، چې د شرکت د عوایدو په زیاتوالي او د مالي چارو په لا منظمېدو کې به مهم رول ولوبوي.
د شرکت د مسوولینو په خبره؛ په آسیا سوداګریز مارکېټ کې شاوخوا ۱۸۰ هټۍ او غرفې شتون لري، چې دا مهال د بېلابېلو سوداګریزو فعالیتونو لپاره کارول کېږي او لسګونو هېوادوالو ته یې د کار زمینه برابره کړې ده.
