د ارزاقو امارتي شرکت د سوداګریزو چارو رییس د ګمرکونو له لوی رییس سره وکتل
وړمه ورځ د ارزاقو امارتي شرکت د سوداګریزو چارو رییس مولوي سید نیک محمد معتصم د ګمرکونو له لوی رییس مولوي محمد حامد احمد سره وکتل.
په دې کتنه کې د ارزاقو امارتي شرکت د حقوقي او سوداګریزو چارو سلاکارانو او د ګمرکونو ریاست د پلان او پالیسۍ رییس هم ګډون کړی و.
د کتنې پر مهال د ارزاقو امارتي شرکت د وارداتي توکو د بهیر په برخه کې د ګمرکونو د لا زیاتې همکارۍ او د دواړو ادارو ترمنځ د لا ښې همغږۍ پر رامنځته کولو خبرې وشوې.
همداراز، د وارداتو د بهیر د اسانتیا او چټکتیا په موخه د ګمرکي پروسو او اړوندو چارو په اړه بحث او د نظرونو تبادله وشوه.
په دې ناسته کې دواړو لوریو هوکړې ته ورسېدل، چې د ګډې همکارۍ د لا پیاوړتیا، د چارو د ښه تنظیم او د وارداتي بهیر د ښه مدیریت په موخه به په راتلونکي کې د دواړو ادارو ترمنځ هوکړه لیک لاسلیک شي.
د ناستې په پای کې پر یو شمېر نورو اړوندو موضوعاتو هم خبرې وشوې او دواړو لوریو د ګډو همکاریو پر دوام ټینګار وکړ.
