د ارزاقو امارتي شرکت فعالیتونه مخ پر وده دي
د نشراتو مدیریت
ارزاقو امارتي شرکت د خپلو اغېزمنو او پراخو خدمتونو له لارې توانېدلی، چې دولتي او غیردولتي ادارو ته اړین خوراکي توکي پر وخت او په لوړ کیفیت ورسوي. سږکال د دې شرکت د خدمتونو کچه د تېرو کلونو په پرتله شاوخوا پنځه اتیا سلنه ښه شوې ده. دغه شرکت په دوه برخو کې فعالیت لري، چې یوه یې اساسي او بله یې غیراساسي ده.
په اساسي برخه کې شرکت د خوراکي توکو د برابرولو، ګدامدارۍ او لېږد پر خدمتونو تمرکز کوي. دا مهال ارزاقو امارتي شرکت له څلورو مهمو وزارتونو سره د خوراکي توکو د لیږد قراردادونه لري، چې پکې د کار او ټولنیزو چارو، لوړو زده کړو، پوهنې او عامې روغتیا وزارتونه شامل دي. له همدې لارې شرکت توانېدلی، چې د دولتي ادارو اړوند لیلیو، روغتونونو، روزنتونونو، تخصصي او دیني مراکزو ته د اړتیا وړ تازه او خام توکي په منظم ډول ولیږدوي.
د ترسره شویو قراردادونو له مخې؛ ارزاقو امارتي شرکت اړوندو ادارو ته له خپلو ګدامونو خوراکي توکي برابروي، د ولایتونو نماینده ګۍ ته یې لېږدوي او له هغه ځایه بیا اړوندو مسوولینو ته یې سپاري.
په غیراساسي برخه کې شرکت خپل جایدادونه د سوداګریزو سهولتونو له مخې په قرارداد او یا هم په کرایه ورکوي. د شرکت جایدادونه اوس مهال په سوداګریزو مارکیټونو، هټیو او نورو خدماتي برخو کې کارول کېږي، چې له امله یې یاد شرکت ته د پام وړ عواید جمع کېږي.
د ارزاقو امارتي شرکت فعالیتونه د هېواد په اقتصادي وده کې رغنده رول لوبولی دی، چې دغه شرکت نه یوازې د توکو لېږد باوري کړی؛ بلکې ګڼ شمېر فني او غیر فني کسانو ته یې د کار زمینه هم برابره کړې ده.
په پام کې ده، چې شرکت د خپلو خدمتونو ساحه پراخه، د خدمتونو کیفیت نور هم لوړ کړي او نورې ادارې هم د خپلو خدمتونو تر چتر لاندې راولي.
دا هم د ویلو ده، چې د ارزاقو امارتي شرکت ژمن کارکوونکي له خپلو چوپړیزو فعالیتونو خوښ دي، شپه او ورځ هڅه کوي، چې خپلو هېوادوالو ته لوړ کیفیت لرونکي، باوري خدمتونه وړاندې او د شرکت پرمختګ ته دوام ورکړي.
