د ارزاقو امارتي شرکت اجرائیوی رییس د ختیځ زون ولایتونو ته رسمي سفر وکړ؛
د ارزاقو امارتي شرکت اجرائیوی رییس مولوي عبدالرازق رفیع وړمه ورځ د یو رسمي سفر په ترڅ کې د ختیځ زون ولایتونو د ارزاقو امارتي شرکت له اداري چارو، سوداګریزو جایدادونو او د بنسټیزو پروژو د نظارت او څارنې لپاره د اړوند سیمو څخه لیدنه وکړه. په دې سفر کې د جایدادونو غړی انجنیر عبیدالله او د سکرتریت استازي رحماني هم ورسره مل وو.
مولوي عبدالرازق رفیع په ننګرهار ولایت کې د ارزاقو امارتي شرکت اړوند سنګي ګدامونو په سیمه کې د سوداګریز مارکیټ د جوړېدو له ودانیزو چارو څخه لیدنه وکړه، چې ویل کېږي د یاد مارکیت چارې کابو ۷۰ سلنه رغېدلي دي.
د سفر پر مهال مولوي عبدالرازق رفیع د ننګرهار ولایت د ارزاقو مدیریت له جایدادونو او بنسټیزو چارو څخه هم لیدنه وکړه او د اړوند ادارې مسوول ته په چارو کې د پرمختګ، د بنسټیزو فعالیتونو د پروژو د ښه تطبیق او د جایدادونو د ساتنې او مراقبت غوښتنه وکړه.
د دې سفر په ترڅ کې د ننګرهار ولایت د ارزاقو مدیر محمد نعمان د ارزاقو امارتي شرکت اجرائیوي رییس ته د دې ولایت د ارزاقو املاکي جایدادونو، د بنسټیزو فعالیتونو او اداري چارو په اړه معلومات وړاندې کړل او یو لړ ستونزې او وړاندیزونه یې د شرکت مشرتابه ته یادونه وکړه.
