د ارزاقو امارتي شرکت د ولایتي مدیرانو روزنیز ورکشاپ پای ته ورسېد
د ارزاقو امارتي شرکت د ولایتي مدیرانو لپاره دوه ورځنی روزنیز ورکشاپ، چې تېره ورځ پیل شوی و، نن په بریالیتوب سره پای ته ورسېد.
دغه ورکشاپ د مدیریتي چارو د ښه والي په موخه جوړ شوی و، چې پکې د املاکي، تدارکاتي، مالي، پروژوي چارو د تطبیق، سوداګریزو پراختیا، ټکنالوژي او اداري برخو اړوند روزنیز موضوعات د شرکت د آمرینو له خوا د پریزنټیشنونو له لارې وړاندې شول.
د ورکشاپ ګډونوالو یو له بل سره خپلې تجربې شریکې کړې، دوی ټېنګار وکړ، چې د دې ډول پروګرامونو له لارې به د مدیریتي چارو د ښه والي په برخه کې اغېزمن ګامونه پورته شي.
ګډونوالو یاد روزنیز پروګرام اغېزمن وباله او زیاته یې کړه، چې دا ډول ورکشاپونه د کاري چارو د پرمختګ او د ستونزو د هواري برخه کې مهم رول لوبولای شي، دوی همداراز د ورته نورو روزنیزو پروګرامونو د جوړېدو غوښتنه وکړه.
د ورکشاپ په پای کې د ولایتي مدیرانو پوښتنو، وړاندیزونو او غوښتنو ته د اړوندو برخو د آمرینو له خوا قناعت بښونکي ځوابونه وړاندې شول.
د ارزاقو امارتي شرکت اجرائیوي رییس مولوي عبدالرازق رفیع، د مالي او اداري چارو رییس مولوي مطیعالله مجروح او د سوداګریزو چارو رییس مولوي سیدنیک محمدمعتصم د ورکشاپ په پای کې لنډې او ارزښتناکې ویناوې وکړې. هر یوه ولایتي مدیرانو ته د فعالیتونو په ښه ترسراوي او د خدمتونو د کیفیت د لوړولو په اړه مهمې لارښوونې وکړې.
دوی له ګډونوالو غوښتنه وکړه، چې د دې روزنیز پروګرام موضوعات د اداري ورځنیو چارو ترسره کولو کې عملي کړي. ورکشاپ د دعا په لوستلو سره پای ته ورسېد.
