د سرپل ولایتي روغتون ته ۸ قلمه خوراکي توکي ولېږدول شول
د سرپل ولایت د ارزاقو مدیریت له لوري د دې ولایت، ولایتي روغتون ته د اړتیا وړ اته قلمه خوراکي توکي لېږدولي او سپارلي دي.
د سرپل د ارزاقو مدیریت د مالي او اداري مدیر فضلالدین امید په رالیږلي معلوماتو کې ویلي، چې وړمه ورځ یې ولایتي روغتون ته اته قلمه خوراکي توکي لېږدولي دي او د کتني د پلاوو له ارزونې او تایید وروسته په رسمي توګه د روغتون اړوندو مسوول ته وسپارل شول.
د هغه په وینا، په لېږدول شویو توکو کې؛ ۳۰۰۰ کیلوګرامه وریجې، ۲۰۰۰ لیټره غوړي، ۲۰۰ کیلوګرامه شین چای، ۵۰۰ کیلوګرامه لوبیا، ۲۰۰ کیلوګرامه د روميانو رُوب، ۱۰۰ کیلوګرامه سره ممیز، ۵۰۰ کیلوګرامه بوره او ۱۰۰ کیلوګرامه مالګه شامل دي. همدارنګه، د دغو توکو ترڅنګ ۹۰۰ کیلوګرامه اوبلن ګاز هم یاد روغتون ته لېږدول شوی دی.
د یادونې وړ ده، چې ارزاقو امارتي شرکت له لوري د شویو تړونونو له مخې، د هېواد په ټولو ولایتونو کې د خوراکي توکو د لېږد بهیر په منظم ډول روان دی.
