د هرات ولایت د ارزاقو لوی مدیر د کار او ټولنیزو چارو ریاست اړوند روزنتون څخه لیدنه وکړه
د هرات ولایت د ارزاقو لوی مدیر نعمتالله نائب وړمه ورځ د دې ولایت د کار او ټولنیزو چارو ریاست اړوند د هلکانو له روزنتون څخه لیدنه او څارنه وکړه، چې په دې کتنه کې د یاد ریاست یو تن استازی هم ورسره مل و.
ښاغلي نعمتالله نائب څرګنده کړه، چې دا مهال په دې روزنتون کې یتیم او بېسرپرسته ماشومان تر روزنې لاندې دي او د دوی د اړتیا وړ خوراکي توکي د ارزاقو امارتي شرکت له لوري برابرېږي.
ده ډاډ ورکړ، چې د روزنتون د خوراکي توکو د برابرولو بهیر په منظمه او مؤثره توګه پرمخ ځي. نوموړي زیاته کړه، چې د دې روزنتون مسوولین د ارزاقو امارتي شرکت له خدمتونو خوښ او له وړاندې شویو چوپړتیاوو رضایت لري.
د یادونې وړ ده، چې د څارنې، ارزونې او د خوراکي توکو د برابرولو لړۍ نه یوازې په مرکز؛ بلکې د هېواد په ټولو ولایتونو کې د ارزاقو امارتي شرکت له خوا په دوامداره توګه ترسره کېږي.
