د ارزاقو امارتي شرکت اجرائیوي رییس بامیان ولایت ته سفر وکړ
د امارتي شرکتونو لوی ریاست اړوند د ارزاقو امارتي شرکت اجرائیوي رییس مولوي عبدالرازق رفیع د یوه دوه ورځني رسمي سفر په ترڅ کې بامیان ولایت ته سفر وکړ.
د دغه سفر موخه په بامیان ولایت کې د ارزاقو امارتي شرکت د اداري چارو، روانو فعالیتونو او د پروژو د تطبیق څرنګوالي څارنه او ارزونه وه، چې د چارو د لا ښه والي لپاره د لازم اقداماتو په اړه بحث ترسره شو. په دغه دوه ورځني سفر کې د ارزاقو امارتي شرکت د سوداګرۍ پراختیا او پانګونې د جلب آمر اسدالله ابراهیمي او د شرکت سکرتر رحماني عمیر هم د اجرائیوي رییس ملتیا کوله.
مولوي عبدالرازق رفیع بامیان ولایت ته د خپل سفر پر مهال د ارزاقو مدیریت له بېلابېلو اداري برخو څخه لیدنه او کتنه وکړه او د اړوندو چارو د ترسره کېدو بهیر یې له نږدې وڅاره. نوموړي د ادارې د فعالیتونو د لا ښه تنظیم، د موجوده امکاناتو د اغېزمنې استفادې او د چارو د چټکتیا په موخه اړوند مسوولینو ته لازمې لارښوونې وکړې.
د بامیان ولایت د ارزاقو لوی مدیر نعمت الله رحمتي د شرکت اجرائیوي رییس ته په دغه ولایت کې د شرکت د پروژو د تطبیق څرنګوالي، اداري چارو، روانو فعالیتونو او نورو اړوندو موضوعاتو په اړه هر اړخیز معلومات وړاندې کړل. نوموړي همدارنګه د چارو د لا ښه والي، د شته ستونزو د حل او د فعالیتونو د پراختیا په موخه یو شمېر وړاندیزونه او غوښتنې له اجرائیوي رییس سره شریکې کړې.
د ارزاقو امارتي شرکت اجرائیوي رییس د یادو معلوماتو او وړاندیزونو تر اورېدو وروسته د اړوندو برخو د چارو د ښه تنظیم او د شته ستونزو د حل په اړه لازمې سپارښتنې وکړې او ټینګار یې وکړ، چې د شرکت اړوند فعالیتونه باید په ښه توګه او مسوولانه ډول پر مخ یووړل شي.
د ارزاقو امارتي شرکت اجرائیوي رییس مولوي عبدالرازق رفیع د خپل دوه ورځني رسمي سفر له پای ته رسېدو وروسته، بېرته خپل کاري دفتر ته راستون شو.
