د کابل استقلال روغتون ته ۸ قلمه خوراکي توکي ولېږدول شول
ارزاقو امارتي شرکت د خپلو بنسټیزو فعالیتونو، سوداګریزو چارو او د ۱۴۰۴ مالي کال د پلان له مخې؛ نن ورځ د کابل استقلال روغتون ته ۸ قلمه اړین خوراکي توکي لېږدولي دي.
د ارزاقو امارتي شرکت د پروژو د تطبیق آمر جان محمد عمري وایي، چې دغه خوراکي توکي د یاد روغتون د مسوول د غوښتنې په پام کې نیولو سره برابر او لېږدول شوي دي.
نوموړي زیاتوي، چې په دغو خوراکي توکو کې؛ ۲۰۰۰ کیلوګرامه وریجې، ۴۵۰ کیلوګرامه مایع غوړي، ۳۰۰ کیلوګرامه لوبیا، ۳۰۰ کیلوګرامه اومه نخود، ۱۰۰ کیلوګرامه د خواړو مالګه، ۳۰۰ کیلوګرامه بوره، ۷۰ کیلوګرامه شین چای او ۱۳۰ کیلوګرامه وچې شېدې شاملې دي.
عمري څرګندوي، چې دغه توکي د دواړو لوري د کتنې پلاوي په شتون کې د کابل د استقلال روعتون مسوول ته سپارل شوي دي. د یاد روغتون مسوول د ارزاقو امارتي شرکت له خدمتونو خوښي ښودلې او د دوی له فعالیتونو څخه یې بشپړ رضایت څرګند کړی دی.
هېره دې نه وي، چې ارزاقو امارتي شرکت دا مهال په مرکز او ولایتونو کې د هېواد ګڼ شمېر دولتي روغتونونو، پوهنتونونو، روزنتونونو، دارالعلومونو او دیني مدرسو ته د خوراکي توکو د برابرولو او لېږد بهیر ګړندی کړی دی.
