د ارزاقو امارتي شرکت د غوره فعاليتونو د ترسره کولو هڅې ستايل شوي دي
د تېرو دوه کلونو په شان يو ځل بيا د ارزاقو امارتي شرکت د غوره او پر وخت فعاليتونو چې د دې کال د بنسټيز پلان او اساسي موخو له مخې ښوونيزو، روغتيايي مرکزونو، بنسټونو او ځيني امارتي ادارو ته چې تړونونه ورسره لري، باکيفيته او ارزانه خوراکي توکي لکه لوبيا، دال نخود، وريځې، وچ چاى، غوړي او ترکاري باب شامل دي پر وخت د پروژو د پلي کېدو د ټيم لخوا برابر او لېږدول شوي، چې له امله يې د ښوونيزو او روغتيايي مرکزونو او دولتي ادارو د رضايت او خوښي ښودلو په ترڅ کې د فراه ولایت پوهنتون، د غزني ولایت دپوهنی د ریاست اړونده دارلعلوم او د سرپل ولایت د عامې روغتیا ریاست، د کابل د سرطان د کنټرول ملي پروګرام روغتيايي مرکز او د کابل ولايت ديني مدرسو لخوا ستاينې شوي او دغه شرکت ته يې په معنوي توګه ستاينليکونه ډالۍ کړي دي.
د ارزاقو امارتي شرکت مسولین وایي، چې د سوداګريزو او اقتصادي چارو د پرمختګ لپاره يوه ښه او غوره لار هڅونه او تشويق دى، چې د کړنو پايلې يې مثبتې وي. نو له همدې امله د ارزاقو امارتي شرکت هلې ځلې ستايل شوي دي.
زياتره اقتصادي کار پوهان په دې آند دي، چې د ستاينې او ډالۍ فرهنګ نه يوازې، د شرکت په کړنو اغيزې کوي، بلکې بازارموندنې ته لاره هم پرانيزي.
د ارزاقو امارتي شرکت درې کاله راپه دېخوا د پلازمينې کابل په ګډون د هېواد ولايتونو پوهنتونونو، ښوونيزو بنسټونو، روغتيايي مرکزونو او ځيني دولتي ادارو ته خوراکي توکي برابروي، چې په دې سره يې د هېواد سوداګريز اقتصاد ثبات هم ساتلى او په همدې توګه راتلونکي کالونو کې اوږد مهاله پلانونو باندې کار روان دى.
#دنشراتو مديريت
