د اجرايوي کمېټې نوبتي غونډه جوړه شوه
تېره ورځ د ارزاقو امارتي شرکت د اجرايوي کمېټې نوبتي غونډه د شرکت د غونډو په خونه کې جوړه شوه. د غونډې مشري د شرکت اجرايوي رييس مولوي عبدالرازق رفيع کوله.
په دې غونډه کې د مالي او اداري چارو رييس مولوي مطیعالله مجروح، د سوداګریزو چارو ریيس محمد امين صاحب زاده او د شرکت اړوند بېلابېلو برخو آمرينو او مديرانو ګډون کړی و.
غونډه د قرآنکريم د څو مبارکو آيتونو په تلاوت سره پيل شوه. د اجنډا له وړاندې کولو دمخه اجرايوي ریيس مولوي عبدالرازق رفيع ديني موضوعات مطرح کړل او څرګنده یې کړه، چې د ديني لومړيتوبونو پېژندنه او عملي کول باید له هر څه وړاندې په پام کې ونیول شي او په دې برخه کې باید کوټلي او اغېزمن ګامونه پورته شي.
ورپسې د تېرې ناستې د پرېکړو د تطبیق ارزونه وشوه، چې زياتره پرېکړې مثبتې و ارزول شوې او د پاتې مواردو لپاره د چټکو او مؤثرو اجرااتو سپارښتنې وړاندې شوې.
د غونډې په دوام د مالي، تدارکاتو، املاکو، خدماتو او کارکوونکو چارو آمرینو خپل کاري موضوعات، چې د اجنډا برخه وې غونډې ته وړاندې کړې.
په یاده غونډه کې پر مهمو موضوعاتو پراخ او هر اړخیز بحثونه تر سره شول او په اړه یې اړینې او عملي پرېکړې ونیول شوې.
غونډه د شرکت د لا ښه پرمختګ، د خدمتونو د بهیر د چټکتیا او د شته ستونزو د حل په موخه د مهمو پرېکړو تر نیولو وروسته د دعا په لوستلو سره پای ته ورسېده.
