د ارزاقو امارتي شرکت د دعوت او ارشاد لوی مدیر خپله دنده پیل کړه
مولوي محمد رمضان عزام د ارزاقو امارتي شرکت د دعوت او ارشاد نوی مدیر په توګه رسماً د شرکت اجرائیوي رییس مولوي عبدالرازق رفیع له خوا د شرکت آمرینو، مدیرانو او کارکوونکو ته ور وپېژندل شو او په رسمي توګه یې دنده پیل کړه.
د دعوت او ارشاد مدیر د پېژندګلوي پر مهال د شرکت د مالي او اداري چارو رییس مولوي مطیعالله مجروح، د سوداګریزو پراختیا رییس محمدامین صاحبزاده، د کارکوونکو چارو، مالي، املاکو، خدماتو، تدارکاتو او نورو اړوندو برخو مدیرانو ګډون کړی و.
د ارزاقو امارتي شرکت رییس مولوي عبدالرازق رفیع د آمرینو د اطاعت په اړه خبرې وکړې، ویې ویل؛ موږ ته لازمه ده، چې د خپلو آمرینو اطاعت وکړو، ځکه دا الهي امر ده او د ټولنې د نظم د برابرولو او پرمختګ سبب ګرځي.
مولوي رفیع زیاته کړه: هغه چا ته چې مسوولیت وسپارل شي او هغه په ایماندارۍ سره تر سره کړي، نو په دنیا او آخرت کې به بریالی وي.
همداراز اجرائیوي رییس د دعوت او ارشاد لوی مدیر خپلې دندې ته متوجه کړ او په چارو کې یې ورته د بریا هیله څرګنده کړه.
د دعوت او ارشاد لوی مدیر د ارزاقو امارتي شرکت په وړاندیز او د امارتي شرکتونو د لوی ریاست د ۶۴۲ ګڼه حکم له مخې؛ په دنده ګمارل شوی.
نوموړی د نور المدارس فاروقي له جامعې څخه د لویې دورې فراغت سند لري او له دې وړاندې د غزني ولایت په نظامي برخو کې دندې ترسره کړي دي.
