د ارزاقو امارتي شرکت د ولایتي مدیرانو لپاره دوه ورځنی روزنیز ورکشاپ پیل شو
د ارزاقو امارتي شرکت له لوري د هېواد د ۳۳ ولایتونو، د ولایتي مدیرانو لپاره دوه ورځنی روزنیز ورکشاپ د مدیریتي چارو د ښه والي په موخه د شرکت د غونډو په تالار کې پیل شو.
د ورکشاپ د پرانیستې په مراسمو کې د شرکت اجرائیوي رییس مولوي عبدالرازق رفیع، د مالي او اداري چارو رییس مولوي مطیع الله مجروح، د سوداګریزو چارو د پراختیا رییس مولوي نیک محمد معتصم او د شرکت د بېلابېلو آمریتونو؛ آمرینو ګډون کړی و. د ورکشاپ د پرانستې په پیل کې د قرانکریم څو مبارک آیاتونه تلاوت شول.
ورپسې د شرکت اجرائیوي رییس مولوي عبدالرازق رفیع ګډونوالو ته ښه راغلاست ووایه او د ورکشاپ پر اهمیت یې خبرې وکړې.
هغه د اسلامي شریعت په رڼا کې خبرې وکړې ویې ویل، چې په نړۍ کې د پرمختګونو، اختراعاتو او ټکنالوژۍ ټول برکتونه د قرآنکریم له لارښوونو اخیستل شوي دي. نوموړي ټینګار یې وکړ، چې ټول باید د قرآنکریم پر اهدافو او حقیقتونو ځان پوه کړي او د خپل ژوند لارښود وګرځوي.
ښاغلي رفیع همداراز د نړۍ پر سیاستونو، حکومتولۍ، سوداګریزو او ټولنیزو چارو هم ارزښتناکې خبرې وکړې زیاته یې کړه، چې د ټولو موخو د ترلاسه کولو بنسټیزه لار یوازې زده کړه او پوهه ده. نوموړي څرګنده کړه، چې د علمي او فرهنګي کچې لوړول د هېواد اقتصادي پرمختګ او ځان بسیاینې ته لاره هواروي.
اجرائیوي رییس له ګډونوالو وغوښتل، چې خپلې تجربې له یو بل سره شریکې او د تجربو تبادله د کارونو د پرمختګ او د ستونزو د حل په برخه کې مهم رول لوبولای شي، همدارنګه د ورته روزنیزو پروګرامونو جوړول یې اړین وباله او د کارکوونکو د مدیریتي چارو په ښه والي او پرمختګ کې اغېزمنتیا رامنځته کول یاد کړل.
مولوي عبدالرازق رفیع د خپلو خبرو په پای کې د ولایتونو له مدیرانو وغوښتل، چې خپلې چارې ګړندۍ کړي او د شته ستونزو د حل لپاره له مرکزي ادارې سره همغږي زیاته کړي، څو د خدمتونو د وړاندې کولو په بهیر کې ځنډ رامنځته نه شي.
وروسته د ورکشاپ روزنیز پروګرام پیل شو. ټاکل شوې ده، چې د شرکت اړوند آمریتونه په خپلو تخصصي او مسلکي برخو کې مهم موضوعات د دوو ورځو په ترڅ کې ګډونوالو ته وړاندې کړي.
