د ولایتي مدیریتونو اړوند خالي بستونو لپاره تقریري آزموینه واخیستل شوه؛
د ارزاقو امارتي شرکت د ۷ ولایتونو؛ کندهار، فراه، بدخشان، بغلان، میدان وردګ، بلخ او غور د ارزاقو مدیریتونو اړوند د خالي بستونو د ډکولو په موخه څو ورځې وړاندې تحریري آزموینه اخیستل شوې وه، چې ۶۲ کسانو په کې ګډون کړی و.
د تحریري آزموینې په دوام؛ وړمه او نن ورځ له هغو نوماندانو څخه چې لوړې نمرې یې ترلاسه کړې وې، تقریري (مرکه یي) آزموینه هم واخیستل شوه.
یاده مرکه یي آزموینه د ارزاقو امارتي شرکت د مالي او اداري چارو رییس مولوي مطیع الله مجروح، د سوداګریزو چارو رییس محمدامین صاحبزاده، د آزمویني کمېټې د پلاوو له خوا او د امارتي شرکتونو د لوی ریاست د استازي عزیزاحمد نظري په شتون کې واخیستل شوه.
د کارکوونکو چارو سرپرست آمر ښادي ګل صاحبزاده وايي، چې د ۷ ولایتونو د ارزاقو مدیریتونو پورې اړوند خالي بستونو لپاره شپږ ورځې وړاندې تحریري آزموینه ترسره شوې وه، چې له ۶۲شمېر ګډونوالو څخه ۲۸ تنه نوماندانو، چې لوړې نمرې یې ترلاسه کړې وې د اړوندو بستونو لپاره تقریري آزموینې ته را غوښتل شوي وو.
نوموړي زیاته کړه، چې یوازې د فراه ولایت د ارزاقو مدیریت اړوند خالي بست ته هېڅ یو نوماند ونشو کړای، چې په لیکلې آزموینه کې لازمې نمرې ترلاسه کړي.
د هغه په خبره؛ د یادو ولایتونو د ارزاقو مدیریتونو پورې اړوند خالي بستونو کې د مالي، اداري او املاکو او یو عمومي مدیریت شامل و.
یادونه باید وشي، چې ارزاقو امارتي شرکت هڅه کوي، ترڅو د شفافو او عادلانه سیالیو له لارې مسوولیتونه وړ، تخصصي او مسلکي کسانو ته وسپاري.
