د پکتیکا ولایت د ارزاقو مدیریت چارې ښې روانې دي؛
د پکتيکا ولايت د ارزاقو مدير فضل الرحمن فضلي په دې وروستیو کې وايي، چې د دوی د اداري چارو بهیر په ښه توګه پر مخ روان دی او په دې پروسه کې د ارزاقو امارتي شرکت د پروژو څارنه هم په منظم ډول ترسره کېږي.
نوموړي زياته کړه،مخکې په دې ولايت کې د ارزاقو مدیریت دفتر لپاره ځانګړې ځای په پام کې نه ٶ نيول شوى، خو اوسمهال د مديريت د رهبرۍ په هلو ځلو د اوبو او انرژۍ ریاست سره د دوه خونو (اطاقونو)قرارداد شوى، چې دا مهال د مديريت اداري چارې په کې ترسره کیږي او د مدیریت لپاره اړین سهولتونه رامنځته شوي دي.
ښاغلي فضلي د پکتيکا ولايت د کار او ټولنيزو چارو اړوند روزنتون سره د تړون په اړه وويل، چې د کال له پيله د خوراکي توکو د رسولو او برابرولو تړون شوى، چې شاوخوا ۱۱۰ بې سرپرسته ماشومانو ته اړین خوراکي توکي پر وخت د ارزاقو مدیریت له څارنې لاندې رسېږي.
د یادونې وړ خبره ده، چې د ارزاقو امارتي شرکت په ولایتونو کې د خپلو مدیریتونو له لارې بنسټیز فعالیتونه پر مخ وړي او د پروژو څارنه او نظارت هم ترسره کوي.
