د کابل پوهنتون مرکزي لیلیې ته یولس قلمه خوراکي توکي ولېږدول شول
ارزاقو امارتي شرکت د خپلو بنسټیزو فعالیتونو، سوداګریز پلان او د ۱۴۰۴ مالي کال منظور شوي پلان پر بنسټ؛ تېره ورځ یې یولس قلمه خوراکي توکي د کابل پوهنتون مرکزي لیلیې ته ولېږدول.
د ارزاقو امارتي شرکت د پروژو د تطبیق آمر جان محمد عمري وویل، چې دغه د اړتیا وړ خوراکي توکي د کتنې پلاوي په شتون کې د یاد پوهنتون لیلیې اړوند مسوول ته وسپارل شول.
نوموړي زیاته کړه، چې په یادو خوراکي توکو کې؛ ۱۲۰۰۰ کیلوګرامه وریجې، ۳۳۷۵ کیلوګرامه مایع غوړي، ۸۷۵ کیلوګرامه لوبیا، ۱۵۰ کیلوګرامه لوی نخود،۸۵۰ کیلوګرامه د خواړو مالګه، ۱۵۰۰ کیلوګرامه بوره، ۸۰ کیلوګرامه شین چای، ۲۰ کیلوګرامه زیره، ۴ کیلوګرامه د چای هیل، ۳۰ کیلوګرامه د دیګ مساله او ۲۰ کیلوګرامه زردچوبه شامل دي.
د یادونې وړ ده، چې ارزاقو امارتي شرکت دا مهال په مرکز او ولایتونو کې ګڼو دولتي روغتونونو، پوهنتونونو، روزنتونونو، دارالعلومونو او دیني مدرسو ته د خوراکي توکو د برابرولو او لېږد بهیر چټک کړی دی.
